Mara Krismas Hla Music Video-zy: A nathlie thei

Krismas/Christmas zy chhao a vaw hnia kaw heih ba. Krismas hla nathlie ba suh vy. Mara reih ta Krismas hla music video taopa Youtube liata upload pazy sukha liata 'auto' ta play thei awpa ta sopakhypa chata, ary liatapa he moh la na nahthlie thei aw.

Mara Krismas Hla Music Video zy

Nathliena: http://www.maraland.net/videos/gospel/621-mara-krismas-hla-music-video-zy.html

Advent Christmas nata Advance Christmas ânanona pahnopasia viana

Advent tahpa he Latin reih 'adventus' tawhta English reih lata ama lapachhuah hrapa châta, Mara reih lata châ 'âvy hai'(coming) tahna châta; angiatiah leipa ta Abeipa avy haipa hâpa ta apatohpatiana chôta hâ hualuana daihti a châ. 

Advent he December 25 (Christmas Noh) hlata Pahanoh (Sunday) ei palihna noh tawhta athao ta, December 24 ta a chha (Advent starts on the fourth Sunday before Christmas - December 25 and ends on December 24).

Calendar liata Christmas noh (Dec.25) hlata Pahanoh (Sunday) ei palihna noh tawhta advent he a thao ta; Calendar he ko chareih anano vata Nov.27 nata Dec.3 lihkawh liata Pahanoh liana heta '1st Advent Sunday' he athao tyh. Atako ko 2013 liana heta châ December noh 1 heta Advent he athao. 2nd, 3rd nata 4th taihta Advent Sunday y ta, 24th December taihta Advent heta a pahly. He he awnanopazy ta zakhano via syulyu tawhta araoh kawpa ta ama hma tyh dah a châ. A yzie cha 1st advent Sunday tawhta 24th December taihta châ Advent Season (Advent daihti) tahpa a châ. He chhoh he Advent Christmas cha a hma theipa a châ.

A yzie cha Advent he awnanopa calendar liata noh kha noh hmo atlopa tlyma daihti (one day event) reina châ leipa ta, 1st Advent Sunday tawhta Dec.24th - hata ei palih rachhoh reina a châ.

Advent tahpa he Latin reih ta adventus tahpa tawhta English nawhta ama lapachhuahpa châhrasala atahma châ Advent tahpa he chyhsa hropazy avy haipazy dy vei, Abeipa Zisu Krista avyhaipa dei he ady tahna chhao a châ chai hra.

Advance Christmas tahpa deikua châ adaihti atlo hlata a vaw hma hlana tahna tla châta, Advent chhoh liata hma lei nozy cha hma aryhpaoh kaw. Advent (1st Sunday to 24th Dec/) chhoh liata hma daihti liata chhao Advent tahpa ta eima hma cheingei leipa chhaota Advance ta hma thei hra pylypa a châ hra. Anodeikua, awnanopa hmozy a cha khiahta cha Advent daihti liata cha Advance hlata Advent tahpa heta hmapa chasala kho achhih via thei. Krizyh leipazy chhao ta Advance Christmas party zy he ahma lyma hra ei ta, amozy tala Advent tahpa reihkah heta ama hma nahta pangiasapa achhih vei. Advance tahpa ta ahma vâta a pha leina y hra leipa ta, programme ataotuhpazy khotlyna a châ chai aw.

Anodeikua cha, Advent tahpa he season (daihti) a hneipa a cha vata Advent season atlo hlâta hma tita châ Advance tahpa ta hmapa he kho achhih via.

Achhana chaina liata apeimawh chaipa châ eima pathipaloh he a châ. Abeipa avyna eima lyzie pamosana châta he hawhpa daihti eima hmapa a cha vâta ataopathi byuhpazy ataopathi ta, asaipa ta asawchapawpa maniah apietuhpa hnohta eima lyna tlokhuh eima hro liata eima palasa via heih awpa he eima lyna chhâ chaipa nata eima dyna chhâ chaipa châ tlao achâ awpa a châ.

Abeipa paso ei chita, ano dy khohna palohru ahneipa zydua sai u, Abeipa ta Krisma byhna châ châpie tlai mawh ei sy.